الشاعر فـــؤاد حـــداد

ــــــــــــــــــــــــــــــــــــــــــــــ

ـــــــــــــــــــــــــــــــــــــــــــــ
"برج البلابل"

الطوبه دى كانت البيت اللى بيضمه
والهدمه دى لسه فيها ريحه من أمه
والرمله دى قايده من عرقه ومن دمه
كل المآسى اللى فوق الأرض بتهمه
عيل يتيم على أطلال البلد سهران


"قتيل المحبّة"

انا اللى زرعت البيوت والعيدان
مايمنعشى عقلى شوية جنان
حيرجع لاسمك رنين الحنان
قتيل المحبة يموت فى الندى


"أيام العجب و الموت"

وش أبيض لابس الطرحه
زى آية منوره بيطل
زى ليلة القدر والفاتحه
اللى من قبل الندى صابحه
كان دعاها ابتهال الفل
ربنا للطيبين أوحى
السلام الهادى والفرحه
الايمان اللى يقف للذل

"مصر المصرية بتغنى"

شمر دراعك
انت حى وصانع
الفين سنه وبانى الهرم والجامع
تشقى الشقا وتركل الموانع
تنهض تخلى الصخر ناطق وسامع
والخد مابتجريش عليه المدامع
والصدر زين الأمهات والمراضع
ودراعها فوق الكل عالى ورافع
الطرحة بيلاقى النهار الطالع
والشمس دايما شمس فوق الزارع

قصيدة
( القهوة )

القهوه تحبّ كنكه
والكنكه تحب كنبه
والكنبه تحب قعده
مبسوطة مربّعه
وكنّا أربعه
أنا وأنتِ وأنا وأنتِ

وكنا عيون كتير
وطبليّه وزير
ولا بنحبّ نبكي
ولا بنعرف نطير
أنا وأنتِ وأنا وأنتِ

سبنا البوسطه ورانا
في الترماي إللي داير
العتبه للإمام
كان ريقك جنبي ساكت
حبّيتك من زمان
أنا وأنتِ وأنا وأنتِ

شمّيت لادن سعيد
شمّيته من بعيد
شمّيته من قريّب
خمس سنين حاغيّب
على الشماعه خايف
وباخاف على الدولاب
وبادوب على البلاط
وباحسّ الظله تقلت
وباسمع الوابور
وباحسّ الميّه تقلب
أنا وأنتِ وأنا وأنتِ


الظُهر الشمس تلحس
الظله في الليمان
والظهر الشمس تعمل
سيبرتايه دهب
بصينا لبعض فيها
ومشينا لبعض نبكي
وقعدنا من التعب
أنا وأنتِ وأنا وأنتِ

باقول لك إيه باقول لك
حاجيب حاجات قديمه
قلبي كوره شراب
نلعب والا ما نلعب
فرحت لنا المدينه
وامبارح في التراب
أنا وأنتِ وأنا وأنتِ

وبنفرش ضينا
على ظلّة بعضنا
واحنا بنبرد هناك
علشان ندفا هنا
والقهوه تقول لنا
على بال النار ما تلسع
بتبقى حنيّنه
أنا وأنتِ وأنا وأنتِ

شعر
فؤاد حداد

قصيدة ( المسحراتي )

_ القدس _

اصحى يانايم وحد الدايم
وقول نويت
بكره أن حييت
الشهر صايم
والفجر قايم
اصحى يانايم وحد الرزاق
رمضان كريم
مسحراتى يامؤمنين
منقراتى مد الأنين
الله على رعشة الحنين
عمره ماكان الأمل ضنين
ياقدس يانوارة السنين
كأن عينى فى ميتمى
ياقدس مايحتمل دمى
الإ أشوفك وأرتمى
وأبوس ترابك المريمى
أبويا وأبنى على فمى
ماأتوهش ياقدس فى المطال
ياعاصره مهجة الرجال
سقاك من دمعته الهلال
ياقدس ياسبحة الشقا
الأعمى فى سجدتك رأى
والفجر من صخرتك سقى
ياقدس تتفجر الجراح
والصبر حرب وأيوب صلاح
ياأخت من مكه والبطاح
قلبى انضرب للعرب وصاح
لابد من فتح فى الصباح
المشى طاب لى
والدق على طبلى
ناس كانوا قبلى
قالوا فى الأمثال
الرجل تدب مطرح ماتحب
وانا صنعتى مسحراتى فى البلد جوال
حبيت ودبيت كما العاشق ليالى طوال
وكل شبر وحته من بلدى
حته من كبدى
حته من موال
لما تقول أجمل مافى الدنيا
الميه للعطشان
يعرفوك عربى
أما للراوى ريحة البرتقان فى مداخل يافا
يعرفوك عربى
لما تقول ابنى اتولد لاجئ
يعرفوك عربى
لما تقول يارب
يعرفوك عربى
لما تباشر جهادك ترمى أوتادك
فى قلب دابح ولاد
يعرفوك عربى
اصحى يانايم وحد الدايم
السعى للصوم خير من النوم
دى ليالى سمحه
دى نجومها سبحه
اصحى يانايم
يانايم اصحى
وحد الرزاق
رمضان كريم

شعر
فؤاد حداد

قصيدة
( أنا المغني)

ليه كل ما نقول آه
الناس تقول الله
أنا المُغني
ضلوعي زي الشجر
بتفرش الظله
وبتبني سقف البيت
لما الحيطان تعلي
وروح يا ليل بالسلامه
وهات يا ليل ابتسامه
من الجميل الغايب
هو الحبيب في الحبايب
هو اللي يعرف ياليل
ليه كل ما نقول آه
الناس تقول الله
أعمل ضلوعي شجر
علشان ترد اللي غاب
وترد قلبه شباب
أعملها سقف وباب
وأعملها مركب
وأفضل ألف البحار
وأغني فجر ومغرب
وأغني ليل ونهار
لحد ما تستعجب
ليه كل ما نقول آه
الناس تقول الله
كان فيه شجر موعود
يصبح كمنجة وعود
تسمع في حسه الودود
ضي النسيم ع الغصن بيتمرجح
ويلاغي ظل الشجر
وسقف بيت في القمر
وجيران تطل وتفرح
وباب يفتح
لكل غايب يعود
ليه كل ما نقول آه
الناس تقول الله

شعر
فؤاد حداد

قصيدة
(الحضرة الزكية)

يا اهل الأمانه والندى والشوق يا مجمّعين
الشمل الحضره الزكية أوِّل ما نبدي
القول نصلّي على النبي
المصطفى سيّد ولد عدنان
آه يا مُنَى عَيْني مُنَى عَيْني
يا سيّدي يا ابن الذبيحينِ
أنت الأمين في هلال محرّم هاجر
ذكر هلال نادى على الأم هاجر
إذ هَرْوَلَت بينَ الصفا والمرْوَه
وبكت ليالي وإسماعيل لم يَرْوَ
بتواجه الريح اللي تعوِي وتجلد
وحجر وظلمه وخوف وشمس ورمل
وكأنها بتحمل ضناها وتولد
واتوحّمتْ ع الميّه طول الحمل
حفيتْ عينيها ولمّا سالت زمزم
بعينيها سالت وارتوى الظمآن
قالت عينيها تبسَّم
عدّت غمامه تنسَّم
ريح الحجاز وَتَوسَّم
أحب أرض الله وطن للزمان
ورجع خياله لحدّ أوِّل يوم
سمع الخليل يطلب من الرحمن
تهوِي إليهم أفئده من القوم
اقبل فؤاد من أفئده
تهوِي إليك
يا خالق العود البريء
كان الفؤاد زي الحريق
لاماء ولا زرع يبلّ ريق
والأم تبكي على الطريق
هاجر هناك الوالِده
اقبل فؤاد من أفئده
تهوِي إليك
العين ما تعدمش الدليل
الدمع في الخد البليل
من فجر أيّام اسماعيل
هاجر تنادي على السبيل
زمزم تردّ على الندا
اقبل فؤاد من أفئده
تهوِي إليك
لما رأى الرؤيا خليل الله
نادى وأخد ولده على يمناه
ما أبعده منّه وما أدناه
فين تبدأ الأشواق وفين المرسى
أنا شفت من برَّه وجوَّه عينيَّ
الشمس ماشيه بتبكي زيّ الخرسا
وبلغ معاه السعي قال يا بنيَّ
شفت اسماعيل في عيونه إنسانان
دمعة حنان زيّ ابتسامة حنان
بيقولوا يا أبتي بأجمل حسّ
كان نصل ما يحتاج إلى سنّان
ورمش نايم في الحجر بيمسّ
اللهُ أكبر أيها المؤمنان
سجد ابراهيم للي ناداه يا ابراهيم
ورأى اسماعيل الدنيا زيّ الميدان
الله هُوَ الرحمنُ وَهوَ الرحيم
والناس إلى الكعبه في نور الأدان
أقبل فؤاد من أفئده
تهوِي إليك
يا قوة الجفن الجريح
لا يرضى بالدمع المريح
ينظر إلى الموت الصريح
النصل فوق نحر الذبيح
الله قبل فيه الفدا
اقبل فؤاد من أفئده
تهوِي إليك
أمري إلى الله الرحيم
على الصراط المستقيم
سبّحت للعرش العظيم
تحت السما وكان إبراهيم
يرفع أساس الأعمده
اقبل فؤاد من أفئده
تهوِي إليك
لما فؤادي اهتدى لمعناه
سجد في صدري شاكرًا لله
اقبل فؤاد بيقول أنا لبّيت
وسعيت لأعتاب الذي حبّيت
من أرض خضرا ومن جبل حجّيت
ومن البراري والعواصم جيت
لك يا بلد يا آمنًا يا بيت
وكأني طاير أو كأني حبيت
اقبل فؤاد من أفئده
تهوِي إليك
يهوي إليك في كل حين
يهوي إليك في الخاشِعِين
والطائِفين والعاكِفين
وفي كل دعوه تقول آمين
منّى ومن أمّ البنين
والأرض تتلقّى الجبين
بين الجموع الساجِده
اقبل فؤاد من أفئده
تهوِي إليك
يقولُ عبدٌ من عبادِ الله
شاعر ولا مرّه فؤادي انعصر
إلا استفاد المعرفه وانتصر
ويبوس على هذا الأثر والأثر
وفي حبّ هاجر يختم الراوِيَه
بكلمه أطيب في النبات والوتر
مما لو انّ السيل وكلّ المطر
وكلّ أنهار البلاد راوِيَه
صلّى الإلهُ على الرسولِ وسلّم
" صلّوا عليهِ وسلّموا تسليما "

شعر
فؤاد حداد

قصيدة
(على باب الله)
فنان فقير على باب الله
الجيب ما فيهشي ولا سحتوت
والعمر فايت بيقول آه
والقطر فايت بيقول توت
صحيتني ليه يا شاويش يا شاويش
أنا كنت سارح في الملكوت
لما بنام بحلم وباعيش
لما بفوق ما بفوقشي بموت
وتقول علىَّ كبير السن
وانا في قلبي ولد كتكوت
وتشوفني ببكي وبانعي وائن
والدنيا لسه بنت بنوت
اشمعنى قلبي ضناه الشيب
من الشقا مهري ومنكوت
قال اللي قال العيب في الجيب
والجيب ما فيهشي ولا سحتوت
والعمر فايت بيقول آه
والقطر فايت بيقول توت
علي المحطة يا ولداه
حتى المحطة كمان حتفوت

شعر
فؤاد حداد