ست الحبايب

خلاص الدنيا فضيت .... فضيت خالص واتغيرت ايامها وطعمها وشكلها !!!!
زمااااااان وانا صغيره ، كان عندي ماما ، وخالتي اللي زي ماما ، وخمس عمات اللي هم زي ماما ، وطبعا جدتين ، مامه ماما و مامه بابا ، وكان يوم عيد الام يوم زحمه ، نجيب هدايا لماما ونكلم خالتي ونروح لجدتي دي وجدتي دي ، ولو ام ابويا في البلد ، نكلمها في التليفون ... يوم زحمه يوم عيد الام ده ،، وبقي يوم عيد الام زحمه خالص ، وشويه شويه الدنيا تتغير ، خالتي ماتت فبقينا نعيط يوم عيد الام لان خالتي الشابه الجميله ماتت ولان بناتها يوم عيد الام يقعدوا يعيطوا واحنا معاهم انا ومامتي وجدتي ..
وبعدين جدتي ام ابويا ماتت فبقوا عماتي يعيطوا واحنا معاهم انا وماما .. واستقرت الدنيا حبه علي حالها ، مامتي وعماتي وجدتي ام امي ... وشويه شويه بطلنا نعيط ورجعت الدنيا زحمه ، هدايا وضحك وورد وتورته وبوس واحضان ، ورب خليكي ياامي ....

كبرت واتجوزت و بقي فيه ماما جديده مع كل الامهات الموجوده اصلا لازم نروح لامي اللي قاعده معاها جدتي مامتها ، وبعدين نرجع نروح لحماتي ، وطبعا انا اكلم عماتي او اروح لهم ، وبقي يوم عيد الام قصير قوي ، كله جري ، ومن قبلها بيومين ، برضه جري ، اشتري هدايا وكل واحد وذوقه ومزاجه واللي يعجبه وليله عيد الام اروح لبتاع الورد وابعت بوكيات لعمتي صفيه وعمتي زنيب ولماما ولحماتي ، وكل بيت نخشه نلاقي اولاد الام اللي راحه ااقول لها كل سنه وانت طيبه ، عند جدتي نينه مديحه الاقي خيلاني واولادهم وماما وبنات خالتي واحنا وهيه بوس واحضان وفرحه ، عند طنط صفيه عمر وبكر والاحفاد ، عند طنط زينب بناتها وحفيداتها واحفادها وبنحبك ياماما زوزو وكل بيت ناكل تورته وجاتوه وضحك ضحك ضحك واللهم مااجعله خير ، ورب خليكي ياامي ...

ماتت جدتي نينه مديحه ، وبقت امي يوم عيد الام تعيط واحنا نعيط وبنات خالتي اللي مامتهم ماتت من زمان يعيطوا ، وبعد مانخلص عياط ، نضحك وناكل التورته ومنك لله يافايزه احمد هريتنا ، وست الحبايب ياحبيبه يااغلي من روحي ودمي ، ونعيط ونضحك ونعيط ونضحك!!!! وبسرعه جت سمر الحفيده الاولي لامي ، وفي عيد الام سمر تجيب هديه لكوكي وهديه لنانا ، وانا ابعت ورد لعماتي ولسه الدنيا حلوه ولسه كلنا بنضحك!! مش بس كده لا ، انتي لولو بتحب سمر وتاخد سمر تفسحها وتوديها وتجيبها ، وانتي لولو معندهاش عيال ، فعلي طول انتي لولو جاره كوكي ، علي طول بقت معانا في عيد الام ، سمر تجيب هديه لانتي لولو ، وانا ابعت بوكيه ورد ليها مع كل البوكيهات ، ولسه يوم عيد الام زحمه خااااااااااالص ، نروح لكوكي ونعدي علي انتي لولو جارتها ، ونجري علي حماتي ، وهدايا عيد الام بقت بالورقه والقلم ، علشان ما ننساش اي ماما من الماماهات الاصليه والبديله !!!! دخلت سمر الحضانه فبقت ماما ديدي مع الامهات اللي بنتحفل معاها بعيد الام ، كانت الله يرحمها صاحبه الحضانه ومديرتها وكانت حنينه وقلبها جميل ، ويوم عيد الام زحمته زادت ، امي وحماتي وعماتي وحضانه سمر ، وبوكيات الورد زادت واحد والهدايا زادت جدا ، المدرسه والداده وماما ديدي وبقيه الفريق القومي للامهات ولسه بنضحك ومبسوطين ويارب يخليكي ياامي ....

ماتت عمتي صفيه ، فرجعنا نعيط يوم عيد الام ونتفكر الماماهات اللي ماتوا ، خالتي هدي الله يرحمها ، تيته نبويه اللي يرحمها ، عمتي صفيه اللي يرحمها !!!! وبعد مانخلص عياط نرجع نبوس المامهات ونضحك وماما ياحلوه يااجمل غنوه عايشه في قلبي وجوه كياني!!!! ودخلت سمر المدرسه وبقي عيد الام يوم قومي ، هديه للناظره والوكيله ومدرسه الفصل ومدرسه الموسيقي ومدرسه الالعاب وداده الباص ، وليله عيد الام تبقي ليله ، اشتري هدايا ونلف الهدايا ونكتب الكروت ونعلم الهدايا علشان مانتخلبطش ، وكمان نشتري هدايا امهاتنا ماما وعماتي وحماتي وانتي لولو وماما ديدي ونبعت بوكيات الورد الصغيره !!!! وشويه شويه ، صالحنا الدنيا وقررت انسي الحاجات اللي كانت مزعلاني ، فبقت مرات ابويا كمان في طابور الورد والبوكيهات ، وكل سنه وانت طيبه ياطنط !!! ولسه اليوم زحمه وبسرعه نسينيا العياط وفضلت الضحك والانبساط والهدايا ويارب خليكي ياامي !!!!

وجت ملك ، وبقي عندي هدايا حضانه ومدرسه وطابور الامهات وانتي لولو وماما ديدي .... وليله عيد الام ننزل انا والبنات نشتري هدايا للمدرسات والامهات ، نركن العربيه وسط الشارع ، ناخد مخالفات ، نجري من محل الهدايا لمحل الورد نبعت الورد لمحل التورت نحجز التورت وبعدين اشتري لامي هديه خاصه جدا ، واشتري لحماتي الهديه اللي ابنها عايزها وعلي ذوقه ، ونروح البيت نسهر للفجر نلف الهدايا والصبح البنات يروحوا المدرسه والحضانه كل واحده معاها شوال هدايا وانا اكلم امي الساعه 7 صباحا ، كوكي كوكي ، كل سنه وانت طيبه ياحبيبتي وانت طيبه يااموره ، واول البنات ماترجع من المدرسه وانا ازوغ من الشغل بدري ، وهيلا بيلا علي حماتي وكل سنه وانت طيبه ، وبعدها علي امي ، هناك مشيره اختي وولادها ، ونقف علي باب البيت انا اطبل والبنات تغني وامي تصقف من جوه وماتراضش تفتح علي طول ، انا اطبل والبنات تصقف من بره الباب وماما ومشيره وولادها يصقفوا من جوه الباب وتفتح وهاتك يابوس واحضان وتورته وهدايا واندهوا انتي لولو تاكل التورته معانا ، ماهي انتي لولو جاره كوكي ونعلي الكاسيت ونغني ست الحبايب ياحبيبه ونجعر ونضحك ويارب خليكي ياامي !!!!
وماتت ماما ديدي وقلت بوكيات الورد واحد !!!!
وماتت عمتي زينب ماما زوزو وقلت بوكيات الورد واحد !!!!
ولسه حماتي ومامتي ومرات ابويا والمدرسات واضيف ليهم مرات عمي طنط عليه ومعهم كلهم انتي لولو!!!!
وسمر دخلت الجامعه وهدايا مدرساتها خلاص خلصوا !!!
وملك باعت القضيه وقررت ان خلاص مافيش هدايا لمدرساتها لان دمهم تقيل وهي مش عايزه تجيب لهم هدايا!!!

و........... ماتت امي !!! وبس خلاص مابقاش فيه عيد ام !!! بقي يوم العياط العالمي ، صحيح بناتي بيجبوا لي هدايا كل سنه ، وبيغنوا وانا معاهم ، لكن خلاص ، معدش جوايا فرحه لعيد الام ، بقي ده اليوم اللي باسمع صوت امي وكلماتها وضحكها وباحس ان كل ده خلص خلااااااااص واني بقيت يتيمه وزعلانه وعايزه اعيط وبس !!! مابقاش فيه عيد ام ، بقي الاحتفال به عبء وبايخ !!! بعد ماامي ماتت روحت مره لمقبرتها ، معايا الورد الاحمر والنعناع الاخضر وقعدت قدامها اعيط واعيط انا ومشيره ، وبعدين حسيت انها مش عايزانا نروح لها في اليوم ده نعيط ونزعل ، كانها بتقولي ماتجيش هنا تاني يااموره يوم عيد الام ، وفعلا ماعملتهاش تاني!!!

والحمد لله بعد كذا سنه من موت امي اتطلقت ، فخلاص حماتي او اللي كانت حماتي خرجت من القايمه ومابقيتش مضطره اروح ااقعد معها واجيب لها هدايا!!!!
و... بمنتهي النداله بطلت ابعت ورد لمرات ابويا ومرات عمي!!!
والبنات كبروا فبقوا يكلموا هما طنطتهم لولو يقولوا لها كل سنه وانت طيبه يوم عيد الام ، او مايقولوش ، براحتهم بقي!!!!
وبس خلاص عيد الام فركش!!!!!
لما كانت امي عايشه ، كنت باعتبر فيه امهات كتير معاها وجنبها يستحقوا ااقول لهم كل سنه وانتم طيبين ، لكن لما امي ماتت مابقاش فيه ام غيرها بعد ما ماتت ومحدش لايستحق ولايستاهل ااقوله كل سنه وانت طيبه يوم عيد الام ... لما كانت امي عايشه من كتر حبي ليها وحبها لي ، كنت باحس ان كل الستات اللي باحبهم امهات يستحقوا هدايا وورد وتورته وهدايا ، لكن بعد امي ماماتت ، خلاص محدش ينفع ياخد مكانها ولا حتي يتقال لها يوم عيد الام في غيابها كل سنه وانت طيبه !!!
ومات طابور الامهات الافتراضيات الحبيبات ... تيته نبويه ، نينه مديحه ، خالتي هدي ، عمتي صفيه ، عمتي زينب ، ماما ديدي ........ وماتت امي الحبيبه الغاليه ودخلت الجنه و" انتي ياماما ملاك من الجنه ، انت ياماما ملاك في الجنه " وبطلت ابعت ورد لللي كنت باعتبرهم امهات او نصف امهات ، لاني امي الحقيقيه ماتت وخدت معاها عيد الام واحتفالاته وفرحته!!!
بعد امي ما ماتت الدنيا فضيت ومابقاش فيه عيد ام ، عيد الام اتلغي بالنسبه لي باعتباري ابنه!!!
اه ربنا يخلي البنات وان شاءالله الاحفاد والحفيدات ، اللي بيحتفلوا وحيحتفلوا بي كماما جدة!!!
ربنا يخلي بناتي الحلوين هما بقي اللي يحتفلوا بي وبعيد الام ... وكلها كذا سنه ويجي لي احفاد وحفيدات يجيوا يحتفلوا معايا بعيد الام ، وحاكون ساعتها انا جدتهم وحالعب معاهم دور امي!!!
وساعتها مش حافتح الباب علي طول لما يخبطوا ، حاصقف واغني زي امي ماكانت بتعمل!!!
وحابوسهم واحضنهم زي امي ماكانت بتعمل !!! وحاكل معاها التورته ونضحك زي ايام امي ماكانت بتعمل!!!!
وحافضل طول العمر لغايه مااموت اقول الله يرحمك ياامي ياحنينه وكلك طيبه ، ياست الحبايب ياحبيبه ياكوكي ياحلوه ياغاليه يااجمل ام في الدنيا ، ويارب تكون شايفاني وسمعاني وحاسه بي وبتقري كلماتي دي وبتسمعي صوتي الجواني اللي بيقولك بحبك ياكوكي وواحشانيي ياكوكي !!!!

| منقول من مدونة أميرة بهي الدين

وانت بالف صحة وسلامة وكل الأبناء والبنات بخير وبسعادة .