رائعة سعد الشرقاوى الثورة المضاده

b](الثورة المضادة)
سعد الشرقاوى

بعد يوم الثورة خوفت
وشوفت مارد فى المنام
يعنى حلقه ف طرف حلقه
وكله واصل للنظام
مين بياكل ودن صاحبه
واللىّ راح فى الفخ كام
,,,
يعنى مركب شايله شيله
مرّه تغرق مرّه تطلع
اللى جاى ع الموجه يركب
واللى فوق ع البر يلمع
واللىّ نفسه ف كلمه قالها
ومين هايقرا ومين هايسمع؟
,,,,
جانى واحد كان مُسالم
قاللىّ كلمة والسلام
قوم خلاص كبّر دماغك
يعنى فكرك ياخدوا كام
القفص يقدر يساعهم
مش ضرورى من الزحام
دا الشهيد هوّ اللىّ قاتل
هىّ دى خلاصة الكلام
,,,
انت عايز مين يحاكم
يابنى كلّ المفسدين
مش كفايه اربع بهايم
سجنهم أربع سنين
والعجول هاتجيب محامى
ويراضيكوا بكلمتين
الجمل يعملله جنحه
والحصان هايجوع يومين
,,,,
والحمار ياخد براءة
والغنم تطلع وترعى
كبش واحد يفدوا بيه
ويعملوله ألف قـُرْعه
يالله روح بوّر فى غيطك
وامـْلى كلّ الارض مرْعه
,,,
والتقيتنى باقول ياساتر
يالطيف اللطف بينا
واترسم قدّام عنيّا
منظر الموج والسفينه
لمّا غضب البحر مالت
كنـّا شايفينها بعنينا
واللى عام للبرْ منها
احنا شدّينه بادينا
بيجازينا بالخيانه
ويصحى يتديّر علينا
كلب ماستكفاش بخيرنا
ولسّه نازل عضّ فينا
,,,,
ايه يفيد حكمك ياقاضى
والامور متظبّطه
الديول ماليا الاراضى
والديابه مربّطه
واللىّ متغطى قصادى
رجله باينه من الغطا
والمُحاكمه هاتلاقيها
ساقطه تحت المضبطه
دا اللى خد اعدام زمان
رسوّا على كومه العطا
,,,,,
لسّه عاتب ع البلد دى
لسّه نور العدل طافى
كل يوم فيها يعدّى
محتاجين هيئة مطافى
شكلنا من فوق مندّى
والقدم من تحت حافى
,,,,
ايه فى ايدنا غير ألمنا
وقلـّة الحيله ومافيش
كلّ يوم يكتر كلامنا
وييجى بكره مانلاقيش
ولمّا شوفنا ف يوم أمالنا
عشنا فرحه ماتنـتهيش
دى العداله بنت خالنا
والنظام كان أصله جيش
,,,,
والملوك هجمت علينا
وقالوا ممنوع الكلام
العماله نرحّلوها
واحنا فى ادينا اللجام
لو بكلمه حاتقولوها
جايره على حق النظام
من حياتكم تدفعوها[/b]
شوف ساعتها تساوى كام
,,,,
قومى يالله وفكىّ قيدك
وارمى حِملك ع الرجال
قومى ياللىّ الحلّ فيدك
ساكته ليه؟ الصبر طال
قومى خللىّ الثورة عيدك
للمزارع والجبال
طول ماصوت الحق فوقك
فى التحدىّ مافيش مُحال
لو بتنسى نفكروكى
بالشهيد ساعة النضال
واللىّ أرواحهم فدوكى
يوم عبورهم للقنال