يعيش الشهيد
ـــــــــــــــــــــــــــــــــــــــــــــــــــــــــــــــــــــ
يا أول شرارة ف كوم الوقيد
يا حلم الفقاري ف قطر الصعيد
يا رمز الحيارى يا خالد سعيد
أنا بعد إذنك وإذنك أكيد
يا فجر الأماني ياحلم الوليد
هكرر ف أسمك واكرر واعيد
وم الحلق ههتف وحبل الوريد
تعيش مصر بلدي يعيش الشهيد
******
يعيش إللي زيك على المجد فات
يعيش إللي وحد صفوف الرايات
يعيش إللي نطّق لسان السُكات
يعيش إللي صحا الضمير إللي مات
يعيش إللي جمّع بدمه الشتات
يعيش إللي علم ولادنا الثبات
وخلد يناير على الدهر عيد
تعيش مصر بلدي يعيش الشهيد
******
يعيش أي مصري يناضل يعيش
يعيش المُجند يعيش الشاويش
يعيش أي قائد بيخدم ف جيش
يعيش أي عامل بيسكن ف خيش
يعيش إللي حالف ف يوم ميطاطيش
يعيش إللي نافش على الظلم ريش
يعيش شعب مصر إللى لان له الحديد
تعيش مصر بلدي يعيش الشهيد
******