راجل حطاب اسمه عم خطاب

كان ياما كان يا سعد يا إكرام يا جيزة يا اسوان ... راجل حطاب إسمه عم خطاب،و عدى سن الشباب، و عايش سعيد ، مع مراته الطيبة، و كل يوم يصلى الفجر ، و يدعى لربنا .. يارب انا راضى برزقى.. و بمراتى .. بس يا رب ياقادر على كل شئ ، نفسى فى حتة عيل ، تكمل بيه فرحتى..... و إضرب بفاسك يا عم خطاب... مرة على الوجيعة .. و مرة على الطبطاب.. و روح بيتك بعد التعب، حتلاقى زغاريط فى الحارة بتقابلك.. و بتقولك مراتك حامل وولدت أجمل بنت فى الدنيا... و كبرت فرحانة ... و إتقدم لها خطاب من كل الدنيا .. إيشى أمير و إيشى وزير... و إيشى ملوك... من جمالها... عيونها عيون المها.. و حسنها لاقبل ولا بعد و و مناخيرها نبقة .. و لها حسن أبقى من أى شعر و كلام... أم فرحانه ... وقفت فى الحارة.. و قالت بصوت عالى .... بنتى ما يخفاش جمالها...و لا يرفعش حجابها.. إلا اللى يجيب لها هدية ز.. لا حد من الإنس و لا الجن .. جابها... كانو تلاتة أصحاب ما يفترقوش... قالوا نروح نجيب الهدية و نتقابل هنا بعد ستة شهور و نشوف كل واحد جاب إيه.. واحد خد سكة السلامة وواحد خد سكة الندامة وواحد خد سكة إللى يروح ما يرجعش... و بلاد تشيلهم و بلاد تحطهم .. و عدوا سبعة صحارى و سبعة بحور و ركبوا سبعة جبال... و إتقابلو بعد الشهور الستة فى نفس المكان... واحد جاب البنورة المسحورة ... تبص فيها تشوف اى مكان فى الحال ( شبة الدش) وواحد جاب البساط السحرى ... تقعد عليه و تطير فى لمح البصر توصل من أول الدنيا لآخر الدنيا.. و التالت جاب لمونة المحاياة.. تعصرها فى فم الميت يقوم بقوة لا إله إلا الله و بإذنه سبحانه و تعالى.... فتحوا البنورة .. شافو مشهد يشيب له الولدان... جنازة فرحانه و أمها بتصرخ و عينيها زى كاسات الدم.. و عم خطاب الحطاب.. منهار زى النخلة لما تقع من الخوف... و بسرعة البرق... ركبوا بساط الريح.. ووصلو للجنازة و فتحو النعش.. و عصر صاحب اللمونة لمونته فى فم فرحانه فقامت بقوة لا إله إلا الله و بإذنه سبحانه و تعالى.... و بعد المغرب.. أتجمعوا جميعا .. علشان يشوفوا فرحانه حتختار مين؟؟ صاحب البنورة إللى عرف إنها فى النعش، و لا صاحب البساط إللى بسرعة البرق كان فى الجنازة ، و لا صاحب اللمونة إللى عصرها فقامت بقوة لا إله إلا الله و بإذنه سبحانه و تعالى....تختار مين؟؟؟ النص الأصلى لفؤاد حداد .. قرأته منذ حوالى 30 سنة و فقدته و مش لاقيه... هل من إجابة؟؟ أيمن أبو الحسن